ប្រធាន​សហព័ន្ធ​ប្រដាល់​គុន​ខ្មែរ​ ថា​អ្នក​ដែល​មាន​ក្បាលពោះ​ធំៗ​ រាងកាយ​កំពីង​កំពោង​អាក្រក់​នេះ​គឺ​មិន​អនុញ្ញាត​ឲ្យ​ធ្វើ​ជា​អាជ្ញាកណ្ដាល​ក្នុង​ព្រឹត្តិការណ៍​ស៊ីហ្គេម​ ២០២៣​ កម្ពុជា​ធ្វើ​ម្ចាស់​ផ្ទះ​នោះ​ទេ​ ព្រោះ​ខ្មាស​គេ។​

ឯកឧត្ដម​ តែម​ ម៉ឺន​ ប្រធាន​សហព័ន្ធ​ប្រដាល់​គុន​ខ្មែរ​បាន​ឲ្យ​ដឹង​ថា​ ចំពោះ​រឿង​អាជ្ញាកណ្ដាល​ ចៅក្រម​នៅ​ស៊ីហ្គេម​ ពេល​កម្ពុជា​ធ្វើ​ជា​ម្ចាស់ផ្ទះ​នេះ​គឺ​មាន​សារសំខាន់​ណាស់​ ដូច្នេះ​ត្រូវ​មាន​ការ​សំរឹទ្ធិសម្រាំង​ខ្លាំង​តែ​ម្ដង។​ ចៅក្រម​ អាជ្ញាកណ្ដាល​ ត្រូវ​ចេះ​ភាសា​ច្បាស់លាស់​អាច​និយាយ​ស្ដាប់​គ្នា​បាន។​

ប្រធាន​សហព័ន្ធ​ខាង​លើ​បញ្ជាក់​ទៀត​ថា​ អាជ្ញាកណ្ដាល​ដែល​ត្រូវ​ឡើង​ចាប់​ការ​ប្រកួត​លើ​សង្វៀន​គឺ​ត្រូវ​តែ​មាន​រាងកាយ​សមសួន​ជា​អ្នក​កីឡា​ ឬ​អាច​និយាយ​បាន​ថា​គ្មាន​ក្បាលពោះ​កំពីង​កំពោង​អាក្រក់​មើល​នោះ​ឡើយ។​ ពោល​អាជ្ញាកណ្ដាល​ក៏​ជា​ការ​បង្ហាញ​ ឬ​បង្អួត​ដល់​ប្រទេស​ដែល​ចូលរួម​ផង​ដែរ​ បើ​ម្នាក់ៗ​មិន​សក្ដិសម​នោះ​ទេ​គឺ​មិន​អនុញ្ញាត​ឲ្យ​ធ្វើ​ការងារ​នេះ​នៅ​ព្រឹត្តិការណ៍​កីឡា​អាស៊ីអាគ្នេយ៍​ខាង​លើ​ឡើយ។​

រំលឹក​ដែរ​ថា​ សហព័ន្ធ​គុន​ខ្មែរ​ប្រហែល​២ឆ្នាំ​មក​នេះ​គឺ​មាន​ការ​កំណែទម្រង់​ច្រើន​ដូច​ជា​ផ្លាស់ប្ដូរ​មុខងារ​មន្ត្រី​មួយ​ចំនួន​ និង​មាន​ការ​រឹត​បន្តឹង​ខ្លាំង​ប្រសិទ្ធភាព​ការងារ​លើ​ផ្នែក​និមួយៗ។​ កម្ពុជា​នឹង​ធ្វើ​ជា​ម្ចាស់ផ្ទះ​ស៊ីហ្គេម​ ២០២៣​ លើក​ទី៣២ ខាង​មុខ​នេះ៕​