អគ្គនាយកដ្ឋានទូរទស្សន៍ជាតិកម្ពុជា ទទក បានប្រកាស បើកកម្មវិធីប្រដាល់ដណ្តើមខ្សែក្រវាត់លើកដំបូង ដែលពុំធ្លាប់មាន ក្នុងរយៈពេល ៣០ឆ្នាំកន្លងមកនេះ ដើម្បីចូលរួមលើកស្ទួយ កីឡាករប្រដាល់គុនខ្មែរ ។
ក្រោយធ្វើកម្មវិធី TVK Fighter ប្រដាល់លក្ខណៈមិត្តភាពបាន៥លើកកន្លងមក កម្មវិធីមួយនេះក៏បានវិវត្តន៍ ហក់ជ្រោងតំឡើងខ្លួនទៅជាកម្មវិធីប្រដាល់ដណ្តើមខ្សែក្រវាត់ ក្នុងប្រភេទទម្ងន់ ៥៧ Kg ដែលបានចំរាញ់យកជើងខ្លាំង ក្នុងវិស័យគុនខ្មែររួចរាល់ហើយ តាមប្រសាសន៍ណែនាំ ពី ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន ។
កាលពីព្រឹកថ្ងៃទី ២៤ ខែកុម្ភៈ ឆ្នាំ ២០២២ កម្មវិធីប្រដាល់ TVK Fighter របស់ អគ្គនាយកដ្ឋានទូរទស្សន៍ជាតិកម្ពុជា បានធ្វើពិធីថតរូបកីឡាករ យកមកផ្សព្វផ្សាយកម្មវិធីខ្សែក្រវាត់ ដែលនឹងចាប់ផ្តើមដំណើរការប្រកួតនៅថ្ងៃទី ១០ ខែមីនា ឆ្នាំ ២០២២ ។
ក្នុងកម្មវិធីថតរូបផ្សព្វផ្សាយខាងលើ ឯកឧត្តម ឃឹម វុទ្ធី អគ្គនាយកទូរទស្សន៍ជាតិកម្ពុជា បានមានប្រសាសន៍ផ្តាំផ្ញើឲ្យកីឡាករ ទាំង ៨រូប ខិតខំប្រឹងប្រែងប្រកួតឲ្យអស់ពីសមត្ថភាព កុំលាក់ក្បាច់ កុំលាក់ស្នៀត ដែលការខិតខំប្រឹងប្រែងនេះ គឺអរគុណទៅដល់ម្ចាស់ស្ពន់ស័រ និង ដើម្បីឆ្លើយតបទៅកាន់ទស្សនិកជន ដែលជាអ្នកគាំទ្រ ។
ឯកឧត្តម ឃឹម វុទ្ធី បានបន្ថែមថា សម្រាប់កីឡាករទាំងអស់ កុំព្រួយបារម្ភរឿងបញ្ហារបួសអំឡុងពេលប្រកួត បើមានករណីរបួស ស្ថានីយទូរទស្សន៍ជាតិ រ៉ាប់រង ដោយព្យាបាលរហូត ដល់ជាសះស្បើយ ១០០% ក្រោយរបួស ជាសះស្បើយ ខាងស្ថានីយនឹងផ្គូផ្គងការប្រកួតឲ្យជាថ្មីជូនផងដែរ ។
បេក្ខភាពដែលចូលរួមប្រកួតទាំង ៨រូប ត្រូវបានបែងចែកជា២ពូល ដោយពូល A មានកីឡាករ ឃួន ឡាំកូស៊ីន , ជ័យ គឹមហុង, សាន្ត វាសនា និង យ៉ន ពិសី ។ សម្រាប់ពូល B វិញមាន កីឡាករ ខាំ កូនខ្លាំ , ធន់ អៀងឡេង , សូដា សុភាព និង បាន លឹម ។
កម្មវិធីប្រដាល់ TVK Fighter ដណ្តើមខ្សែក្រវាត់ ៥៧Kg នឹងដំណើរការប្រកួតរយៈពេល ០៤ខែ ដើម្បីចំរាញ់យកជើងខ្លាំងម្នាក់ មកគ្រងខ្សែក្រវាត់ អមជាមួយទឹកប្រាក់ ២០លានរៀល របស់ស្ថានីយទូរទស្សន៍ជាតិ ៕ប្រភព ៖ Sabay news
