​វិស័យ​បាល់ទះ​នៅ​កម្ពុជា​បច្ចុប្បន្ន​​​កំពុង​មាន​​​ភាព​ទាក់​ទាញ​ពី​មហាជន​ ក្នុង​ការ​​គាំទ្រ​ស្ទើរ​ពេញ​​តារាង​បាល់ទះ​នៅ​ពេល​មាន​ការ​ប្រកួត​ម្ដង​​ៗ​។ យ៉ាង​ណា​យុវជន​ចំនួន ៤​ រូប​នេះ​ទើប​តែ​មាន​វ័យ​២០​ជាង​តិច​តួច ប៉ុន្តែ​សមត្ថភាព​ល្អ​មិន​ធម្មតា។ យុវជន ៤​រូប​នោះ​អ្នក​ណា​ខ្លះ​សូម​​មើល​ខាង​ក្រោម៖

១- ​គួន ម៉ុម ៖ ​កុំ​មើល​ឃើញ​មាឌ​ធំ កម្ពស់​ខ្ពស់ និង​មាន​កាយ​សម្បទា​​សាច់ដុំ​កង់​ៗ គិត​ថា អាយុ​ច្រើន​នោះ​តាម​ពិត​យុវជន​រូប​នេះ​ទើប​តែ​ឈាន​ចូល​ ២៤​ ឆ្នាំ​​ថ្មី​​នេះ​​ប៉ុណ្ណោះ​។ គេ​​កើត​ថ្ងៃ​ទី​១០ ខែ​កក្កដា ឆ្នាំ​១៩៩៦ ​បច្ចុប្បន្ន​មាន​កម្ពស់ ១,៩៦ ម៉ែត្រ ​សម្រាប់​ការ​សិក្សា​​ក៏​បាន​បញ្ចប់​ថ្នាក់​បរិញ្ញាប័ត្រ​​មុខ​ជំនាញ IT នៅ​សាលា វណ្ណដា ​​។ យុវជន​រូប​នេះ​ជា​កីឡាករ​កម្ពុជា​ទី​១ ដែល​បាន​ចេញ​ទៅ​លេង​លីគ​កំពូល ឥណ្ឌូណេស៊ី និង​ទទួល​ស្គាល់​ដោយ​សហព័ន្ធ​កីឡា​​បាល់ទះ​អន្តរជាតិ។

២- វឿន វាសនា ៖ យុវជន​រូប​នេះ​ទើប​តែ​ឈាន​ចូល ២០​ឆ្នាំ​ ក្នុង​ឆ្នាំ​២០២១ នេះ​​ ហើយ​គេ​មាន​កម្ពស់​១,៩៤ ម៉ែត្រ​។ បច្ចុប្បន្ន​យុវជន​​​កំពុង​ត្រូវ​បាន​ក្លឹប​នៅ​ថៃ​មើល​ឃើញ និង​​បាន​ចេញ​លេង​កសាង​កេរ្តិ៍ឈ្មោះ​ក្នុង​ស្រទាប់​បាល់ទះ​ស្រុក​ខ្មែរ​ ដោយ​​យក​ចូល​រួម​​ជា​មួយ​ក្រុម​របស់​គេ​ យក​ឈ្នះ​ក្នុង​ការ​ប្រកួត​ផ្លូវ​ការ ​និង​ជា​​ស្មាត់​ធំ​មួយ​រូប​ប្រចាំ​ក្លឹប​វិសាខា​ និង​បាន​ចេញ​លេង​យក​ឈ្នះ​ក្រុម​។

៣-​ ធី ម៉េង​ហ៊ួង ៖ យុវជន​​រូប​នេះ​ឈាន​ចូល ២០ ឆ្នាំ​​ហើយ សម្រាប់​ឆ្នាំ​​ថ្មី២០២១​នេះ ​គេ​ជា​យុវជន​មក​ពី​ខេត្ត​កណ្ដាល​​មួយ​រូប ដែល​​បាន​សាង​ស្នាដៃ​ល្អ​ក្នុង​វិស័យ​បាល់ទះ​​ ដោយ​បង្ហាញ​ឲ្យ​ឃើញ​ពី​សមត្ថភាព​លេចធ្លោ​ក្នុង​ចំណោម​យុវជន​ជា​ច្រើន​នាក់។ យុវជន​​កម្ពស់ ១,៨៥ ម៉ែត្រ​រូប​នេះ​អាច​លោត​បាន​កម្ពស់​ ៣,៣០ ទៅ ៣,៣៥ ម៉ែត្រ​ ហើយ​បាន​បង្ហាញ​​ឲ្យ​មហាជន​ចាប់អារម្មណ៍​ក្រោយ​យក​ឈ្នះ​ការ​ប្រកួត​ ៣ ស្មើ​ទៅ​លើ​ក្រុម​រាជ និង​ ឌូក ជា​ដើម។

៤-​ ផុល រតនៈ ៖ ​កូន​អ្នក​ព្រៃវែង​រូប​នេះ​ ឈាន​ចូល​វ័យ ២២ ឆ្នាំ​ហើយ សម្រាប់​ឆ្នាំ​២០២១ នេះ​គេ​ជា​យុវជន​មួយ​រូប​ ដែល​មាន​ជំនាញ​ដេញ​បាល់​លឿន ល្អ​ជាង​គេ​របស់​វិសាខា និង​ជម្រើស​ជាតិ​បច្ចុប្បន្ន។ រតនៈ ត្រូវ​បាន​មហាជន​ចាប់អារម្មណ៍​ក្រោយ​បង្ហាញ​សមត្ថភាព​លេង​ល្អ​ខ្លាំង​ក្នុង​ការ​ប្រកួត​មិត្ត​ភាព​កន្លង​មក និង​លេង​យក​ឈ្នះ​ក្រុម​របស់ សុវណ្ណនាថ និង ម៉េង​ហ៊ួង ៤​ ស្មើ​កាល​ពី​ពេល​ថ្មី​ៗ​នេះ។ ​យុវជន​ដដែល​នេះ​មាន​កម្ពស់ ១,៨៨ ម៉ែត្រ​មាន​បង​ប្អូន​ពីរ​នាក់​ ហើយ​ប្អូន​ប្រុស​បង្កើត​របស់​គេ​ក៏​បាន​ចូល​ហាត់​នៅ​វិសាខា​ដូច​គ្នា។

ប្រភព ៖ Sabay News