កាលពីថ្ងៃព្រហស្បតិ៍ អ្នកកាសែតជនជាតិអេស្ប៉ាញម្នាក់ គឺលោក Guillem Balague បានអះអាងថា ក្លិបសេះបង្កង់ Juventus បានផ្តល់ជូនកីឡាករ Cristiano Ronaldo ទៅឱ្យក្រុម Barcelona ។
ពាក្យចចាមអារាមនេះ បានផ្ទុះឡើងយ៉ាងខ្លាំង ដោយអ្នកគាំទ្រនៅទូទាំងពិភពលោកមានក្ដីរំភើប និងសង្ឃឹមថា ខ្សែប្រយុទ្ធព័រទុយហ្កាល់វ័យ ៣៥ឆ្នាំរូបនេះ និងអាចលេងជាមួយគូរប្រកួតប្រជែងស្លាប់រស់របស់គេ គឺ Lionel Messi ។ ទោះជាយ៉ាងណាក៏ដោយ មានប្រភពដែលស្និទ្ធនឹងអតីតកីឡាកររបស់ក្លិបអធិរាជស Real Madrid បានបដិសេធយ៉ាងដាច់អហង្ការចំពោះពាក្យចចាមអារាមនេះ ដោយចាត់ទុកថា វាជារឿងមិនពិតទាំងស្រុង ខណៈអនាគតវែងឆ្ងាយរបស់ Ronaldo នៅទីក្រុងទូរីន នៅតែមិនទាន់ច្បាស់លាស់។
យោងតាមសារព័ត៌មានដ៏ល្បីអេស្ប៉ាញ AS ក៏បានឱ្យដឹងផងដែរថា ប្រភពដែលស្និទ្ធជាមួយ Cristiano បានបញ្ជាក់ទៀតថា របាយការណ៍ណាមួយដែលភ្ជាប់ម្ចាស់ពាន Ballon D’or ៥សម័យកាលជាមួយ Barca គឺគ្មានអ្វីក្រៅពីចង់ទាញចំណាប់អារម្មណ៍នោះទេ ហើយការផ្ទេរនឹងគ្មានថ្ងៃអាចកើតមានឡើងឡើយ៕
